Søke om ettergiving av forseinkingsgebyret eller fritak frå solidaransvar
Sist oppdatert: 20. februar 2025.
Det er mogleg å søke om ettergiving av forseinkingsgebyret eller fritak frå solidaransvar. Solidaransvar inneber at fleire kan vere personleg ansvarleg for same krav.
Forseinkingsgebyret må vere stoppa før du kan søke om ettergiving eller fritak. Du kan ikkje klage på gebyret eller avvise det.
Søknaden skal vere skriftleg. Du må forklare kvifor komplett årsrekneskap ikkje blei sendt til Rekneskapsregisteret innan fristen og du må dokumentere årsakene som du legg til grunn.
Du må betale forseinkingsgebyret sjølv om du søker om ettergiving eller fritak. Dersom søknaden blir innvilga, vil gebyret bli betalt tilbake.
Vilkår for ettergiving eller fritak frå solidaransvar
Rekneskapsregisteret skal vurdere om årsaka i søknaden oppfyller vilkåra utanfor den rekneskapspliktiges kontroll eller særlege rimeleghetsgrunnar. Vilkåra er strenge og det er vanskeleg å få ettergitt forseinkingsgebyret eller å få fritak frå solidaransvaret. Det er berre i spesielle tilfelle at vi kan ettergi forseinkingsgebyret heilt eller delvis. Dei same vilkåra gjeld for fritak frå solidaransvaret.
Eksempel på slike årsaker er
- akutt eller alvorleg sjukdom
- datahavari
- beslag av rekneskapsmateriale
- brann
- tjuveri
- covid-19 (gjeld kun for rekneskapsåret 2019 og 2020)
Eksempel på slike årsaker er
- vankunne om lover og reglar som gjeld
- alder
- sjukdom hos berre ein av fleire solidaransvarlege
- når styrevervet er ein formalitet
- ikkje fått påminning om innsending av årsrekneskap
- lita eller inga drift i verksemda
- at verksemda er under avvikling
- at verksemda har eit velgjerande formål, blir drive på dugnad eller ikkje driv næring
- misforståingar og andre interne forhold mellom dykk og rekneskapsførar/revisor
- dårleg økonomi i verksemda
- at forseinkingsgebyret er urimeleg stort
- arbeidspress
- tekniske problem med rekneskapsprogram eller årsoppgjerssystem
Forhold utanfor den rekneskapspliktige sin kontroll
For at vilkåret kan føre til ettergiving eller fritak, må du dokumentere at det oppstod uventa forhold som var utanfor kontrollen din i rolla som ansvarleg for verksemda. Du må dessutan ha gjort alt som var mogleg for å overhalde innsendingsplikta. Det må også vere samanheng mellom det som har skjedd og at årsrekneskapen ikkje blei send før fristen.
Særlege rimeleghetsgrunnar
Vilkåret gjeld når det blir heilt urimeleg å oppretthalde gebyret. Dette skjer berre i svært spesielle tilfelle.
Skal du søke om ettergiving eller fritak?
Du sender søknaden til:
Rekneskapsregisteret
Postboks 900
8910 Brønnøysund
Du kan også sende søknaden på i kontaktskjemaet vårt, om den ikkje inneheld sensitiv informasjon.
Har du fått avslag på søknad?
Om du får avslag på søknad om ettergiving av forseinkingsgebyret eller fritak frå solidaransvaret, kan du klage på vedtaket. Klagefristen er 3 veker frå du mottek avslaget. Klagen skal vere skriftleg og og underteikna. Du må forklare og dokumentere årsakene som du legg til grunn. Vi vurderer da saka på nytt. Om vi ikkje endrar vedtaket, blir ho send vidare til klageinstansen hos Statens innkrevjingssentral.
Du sender klagen til
Rekneskapsregisteret
Postboks 900
8910 Brønnøysund
Du kan også sende klagen til e-postadressa i kontaktskjemaet vårt, om den ikkje inneheld sensitiv informasjon.